Ҳимоячи Фабиу Коентрау Португалияда бир ўйинга дисквалификация қилинди. Шунингдек, 34 ёшли португалиялик 850 евро миқдорида жаримага тортилди.
Собиқ "Рио-Аве" футболчиси 2021 йил 13 апрелда бўлиб ўтган “Боавишта”га қарши ўйиндаги хатти-ҳаракати учун жазоланган. Тартиб-интизом қўмитаси 486 кундан сўнг якуний қарорни қабул қилиб, футболчини жароҳат етказиш ва футболчини ҳақорат қилишда айбдор деб топди.
Коентраунинг ўзи 2021 йилнинг ёзида профессионал фаолиятини якунлашга қарор қилган. Ҳозир у Вила-до-Кондида яшайди ва балиқчилик билан шуғулланади.
“Спортчининг касбий вазифаларини бажаришни тўхтатганлиги уни содир этган интизомий ҳуқуқбузарликлари учун интизомий жавобгарликка тортиш имкониятини олиб ташламайди”, — дейилади тартиб-интизом қўмитаси хабарида.
