«Насаф» бош мураббийи Рўзиқул Бердиев Ўзбекистон чемпионатининг 16-тури доирасида бўлиб ўтган АГМКга қарши ўйин (0:0) борасида ўз фикрлари билан ўртоқлашди.

"Бугун 2 очко йўқотдик. Ўйиннинг дастлабки 15-20 дақиқалари тенгкурашлар остида ўтди. Шундан сўнг биз ташаббусни ўз қўлимизга олдик. Йигитлар учрашув охирига қадар ғалаба учун курашишди. Бунинг учун уларга миннатдорчилик билдираман. Афсуски, ғалаба қозона олмадик.

Бунга бир нечта сабаблар бор. Биринчидан, биз яратилган вазиятлар ёки "стандарт"лардан фойдалана олмадик.   Иккинчидан, бугунги ҳакамликдан қониқмадик. Буни таъкидлаб ўтишим зарур. Барибир бу ҳақда савол берасизлар. Биринчи ҳолатда Маркога жиддий жароҳат етказишган пайтда ҳолат қизил карточкага тортар эди. Иккинчи вазият — белгиланган пенальти VAR ёрдамида бекор қилинди. Чемпионатимизга VAR жорий қилганимиз билан савиямизни ошириб қўймаса керак. Бу менинг фикрим.

Ҳакамлар устида шикоят ёзганимиз билан ҳеч нарса ўзгармайди. VAR қарорларидан биз кўп жабр чекяпмиз. "Олимпик" ва "Навбаҳор"га қарши ўйинларда ҳам бизнинг зараримизга қарор қабул қилинганди", — деди Рўзиқул Бердиев.