Бу ёзда "Барселона"нинг трансферларини томоша қилиш нақадар ҳаяжонли бўлиб қолди! Бир достон тугаши билан бошқаси бошланиб кетяпти. Энди навбат Бернарду Силвага. У Каталония пойтахти жамоасига ўтадими? Потенциал трансфернинг асосий тафсилотларини сизга ҳавола қиламиз.

"Барса" аллақачон Бернардо билан келишиб бўлган. Аммо иккита муаммо бор

Бу ҳақида инсайдер Николо Скира маълумот берди. Унинг таъкидлашича, ярим ҳимоячи билан тўрт йиллик шартнома аллақачон келишиб олинган, қолгани эса "Сити" билан трансфер суммасини келишиб олиш. "Барса" португалиялик учун 60 миллион евро таклиф қилишга тайёр ва яқин орада расмий таклиф билан чиқмоқчи.

Трансферга нима тўсқинлик қилиши мумкин? Биринчидан, "Сити" билан шартларни муҳокама қилишдан олдин, "Барса" ким биландир хайрлашиши керак. Иккинчидан, инглиз клуби кўп қиррали ярим ҳимоячи билан хайрлашишни умуман истамаяпти. Нуфузли The Athletic нашрининг таъкидлашича, "Сити" Бернардуни 100 миллион еврога сотишга тайёр ва чегирма қилмоқчи эмас.

Пеп Гвардиола ҳам ўзинг севимли футболчиси сақлаб қолмоқчи. Лекин The Athletic нашрининг ёзишича жамоа уни мажбурлаб ушлаб қолмоқчи эмас.

"Мен кўп марта айтганман, энг муҳими футболчининг хоҳиши. Мен жамоадаги ҳамма умумий мақсадда биргаликда ишлашдан хурсанд бўлишини истайман. Албатта, агар Бернарду шу ерда қолса хурсанд бўлардим, у жамоанинг кийиниш хонаси учун ўзига хос шахс, аммо кейин нима бўлишини билмайман.

Нима бўлиши керак бўлса, бўлади. Клубларнинг келишуви бор, футболчиларнинг хоҳиш-истаклари бор, лекин мен уларни амалга ошириш йўлини тўсадиган одам эмасман. Мен жамоада энг яхши ўйинчиларни кўришни истайман, шунинг учун ҳам Бернарду Силва қолишини юз фоиз истайман”, деди Гвардиола.

Шу билан бирга, Гвардиола инсайдерларнинг маълумотларини тасдиқлади: "Барса" ҳалигача "Сити"га Бернарду бўйича расмий таклиф билан чиққани йўқ. Силванинг ўзи кетишга тайёрлигига шама қилмоқда.

Бернардунинг сўзларини бошқача талқин қилиш қийин бўлади. У бир ҳафта олдин айтган сўзлари: “Мен ҳар доим бу ерда бахтли эканлигимни айтганман, лекин келажакда нима бўлишини билмайман. Кўрамиз. Жамоадагилар нима истаётганимни билишади. Қолсам бахтли бўламан, бу клубни доим ҳурмат қилганман ва қўлимдан келганини қиламан. Агар қолмасам, бу футбол. Келинг, нима бўлишини вақт кўрсатади.

Бернардунинг "Сити"дан "Барса"га ўтиш истаги жуда ғалати. Футбол нуқтаи назаридан, бу, албатта, орқага қадам бўлади: каталонияликлар ҳали ҳам қайта қуриш жараёнида. Ўз навбатида, "Сити" кубокларни кафолатлайдиган топ клуб мақомида бўлиб турибди.

Келинг, бу трансферни Роберт Левандовскининг ҳикояси билан таққослайлик. У ҳам топ-жамоада ўйнади, аммо беқарор "Барса"га келиб қўшилди. Ҳужумчининг трансферини тушунса бўлади: у деярли бутун фаолиятини Германияда ўтказди ва 33 ёшида вазиятни ўзгартириб, янги мақсадлар сари интилди.

Бернардунинг ҳолати эса бошқача. У Левандовскидан беш ёш кичик, у Португалияда фаолиятини бошлаган ва “Сити”га ўтишдан олдин икки йилни “Монако”да ўтказган. Бизда бу вазият ҳақида иккита таҳмин бор. Биринчиси унинг оиласи бу трансферни талаб қилмоқда. Иккинчиси унинг ўзи Лапортанинг янги лойиҳаси таркибида ўйнамоқчи.

Бернардунинг “Барселона”га ўтиши ҳақиқатми ёки ёъқ, буни 31 августгача билиб оламиз.