Бугун Республика олимпия ва паралимпия спорт турларига тайёрлаш марказида V Ислом бирдамлиги ўйинлари ғолиб ва совриндорларини тақдирлаш маросими ўтказилди.

Хабарингиз бор, “Коня шаҳрида (Туркия) бўлиб ўтган V Ислом бирдамлиги ўйинларида ғолиб ва совриндор бўлган спортчилар ҳамда уларнинг тренерларини бир марталик пул мукофотлари билан рағбатлантириш тўғрисида”ги Президент қарори имзоланган эди. Қарор ижросини таъминлаш мақсадида бугун ғолиб ва совриндор спортчиларимизни тақдирлаш маросими ташкил этилди.

Тақдирлаш маросимида Ўзбекистон Республикаси Президенти маслаҳатчиси Абдужаббор Абдувоҳидов, Спортни ривожлантириш вазири Адхам Икрамов, Осиё Олимпия Кенгаши вице-президенти Отабек Умаров, вазирлик, Миллий Олимпия ҳамда Паралимпия қўмиталари раҳбарияти иштирок этишди.

Дастлаб, Ўзбекистон Республикаси Президенти маслаҳатчиси Абдужаббор Абдувоҳидов сўзга чиқиб спортчиларимизни мазкур натижа билан табриклади.

Шунингдек, Спортни ривожлантириш вазири A.Ikramov ҳам қўлга киритилган ютуқлар билан спортчиларни табриклаб, кейинги мусобақаларда омад тилади.

Шундан сўнг, Туркияда ўтказилган V Ислом бирдамлиги ўйинларида ғолиб ва совриндор бўлган спортчиларимизга пул мукофотлари тантанали равишда топширилди ҳамда музаффар спортчиларимизнинг ғалабалари шарафига ош тортилди.

Эслатиб ўтамиз, V Ислом бирдамлиги ўйинларида Ўзбекистон умумжамоа ҳисобида 2-ўринни эгаллади. Мазкур мусобақада спортчилармиз 51 та олтин, 42 та кумуш, 65 та бронза, жами 158 та медални қўлга киритишди. Бу Ўзбекистон спорт делегациясининг комплекс мусобақалардаги энг юқори натижаси сифатида тарихга кирди.