Bugun Respublika olimpiya va paralimpiya sport turlariga tayyorlash markazida V Islom birdamligi o‘yinlari g‘olib va sovrindorlarini taqdirlash marosimi o‘tkazildi.

Xabaringiz bor, “Konya shahrida (Turkiya) bo‘lib o‘tgan V Islom birdamligi o‘yinlarida g‘olib va sovrindor bo‘lgan sportchilar hamda ularning trenerlarini bir martalik pul mukofotlari bilan rag‘batlantirish to‘g‘risida”gi Prezident qarori imzolangan edi. Qaror ijrosini ta’minlash maqsadida bugun g‘olib va sovrindor sportchilarimizni taqdirlash marosimi tashkil etildi.

Taqdirlash marosimida O‘zbekiston Respublikasi Prezidenti maslahatchisi Abdujabbor Abduvohidov, Sportni rivojlantirish vaziri Adxam Ikramov, Osiyo Olimpiya Kengashi vise-prezidenti Otabek Umarov, vazirlik, Milliy Olimpiya hamda Paralimpiya qo‘mitalari rahbariyati ishtirok etishdi.

Dastlab, O‘zbekiston Respublikasi Prezidenti maslahatchisi Abdujabbor Abduvohidov so‘zga chiqib sportchilarimizni mazkur natija bilan tabrikladi.

Shuningdek, Sportni rivojlantirish vaziri A.Ikramov ham qo‘lga kiritilgan yutuqlar bilan sportchilarni tabriklab, keyingi musobaqalarda omad tiladi.

Shundan so‘ng, Turkiyada o‘tkazilgan V Islom birdamligi o‘yinlarida g‘olib va sovrindor bo‘lgan sportchilarimizga pul mukofotlari tantanali ravishda topshirildi hamda muzaffar sportchilarimizning g‘alabalari sharafiga osh tortildi.

Eslatib o‘tamiz, V Islom birdamligi o‘yinlarida O‘zbekiston umumjamoa hisobida 2-o‘rinni egalladi. Mazkur musobaqada sportchilarmiz 51 ta oltin, 42 ta kumush, 65 ta bronza, jami 158 ta medalni qo‘lga kiritishdi. Bu O‘zbekiston sport delegasiyasining kompleks musobaqalardagi eng yuqori natijasi sifatida tarixga kirdi.