Relevo нашри хабарига кўра, "Атлетико" ўтган ёздан бери ижара асосида тўп сураётган ҳужумчи Антуан Гризманни "Барселона"дан сотиб олмаслиги мумкин.

Манбага кўра, агар франциялик ҳужумчи ҳар бир ўйинда “матрасчилар” учун 30 дақиқадан кам ўйнаса, у ҳолда сотиб олиш банди мажбурий бўлмайди. Эслатиб ўтамиз, футболчининг "Атлетико" билан ижара шартномаси келаси йилнинг ёзигача амал қилади.

Олдинроқ “матрасчилар” Гризманни 40 миллион еврога сотиб олмоқчи эмаслиги ҳақида хабар берилганди.

Умуман олганда, Мадрид клубига қайтганидан сўнг, 31 ёшли ҳужумчи Испания чемпионатида 28 та ўйин ўтказиб, 4 та гол урди ва 5 та голли узатмани амалга оширди.