Ўзбекистон U16 терма жамоаси бош мураббийи Жамолиддин Раҳматуллаев “Mirabror Usmanov Memorial Cup” мусобақаси 2-тури доирасида Японияга қарши ўтказилган ўйин (3:0) борасида ўз фикрлари билан ўртоқлашди.

"Авваламбор, мухлисларимизни бугунги ғалаба билан табриклайман. Чиройли ўйин ва охиригача курашгани учун шогирдларимга раҳмат айтаман.

Япония футболда ўз ўрнига эга бўлган мамлакат. Улар буни бугун ҳам исботлашди. Болаларни руҳлантиришга, рақибдан чўчимасдан ўйнаш кераклигини тушунтиришга ҳаракат қилдик. Бу ўз мевасини берди.

Энди футболчилар билан тикланиш машқларини ўтаймиз ва рақибдан келиб чиқиб тайёргарлик кўрамиз.

Айни пайтда бу терма билан жамоавий ўйинни шакллантириш устида ишлаяпмиз. Япониядек кучли жамоага қарши баҳсда асосий таркибни синовдан ўтказдик. Кейинги ўйинда эса таркибда ротация қилинади", — деди Раҳматуллаев.