Олий лигада биринчи давра ўйинлари якунига етмоқда. Бугун 12-тур ўйинларига старт берилди. Тошкентнинг "Локомотив" клуби ўз майдонида Зарафшоннинг "Қизилқум" клубини қабул қилди.

Ўйин бошида майдон эгалари зарафшонликлар дарвозаси томон катта босим уюштиришди ва кетма-кет ҳужумлар уюштиришди. Аммо темирйўлчиларга омад етишмади.

Бўлим ўрталарига келиб Равшан Ҳайдаров шогирдлари майдонга мослашиб олишди ва ўз ўйинларини намойиш қила бошладилар. Ҳаттоки, 1-2 вазиятда ҳисобни очишга ҳам яқин келишди: Ғулом Ўруновнинг олис масофадан йўллаган зарбаси дарвоза устуни ёнгинасидан ўтиб кетди.

Иккинчи бўлимда эса майдон эгалари мураббийи керакли чизиқларга янги футболчиларни туширди. Натижада иккинчи 45 дақиқаликда ташаббус тўлалигича Ҳаким Фузайлов жамоаси томонида бўлди. Аммо "Қизилқум" асосий эътиборни ҳимоя қаратгани туфайли, мезбонлар рақиб мудофаа чизиғини ёриб ўтишга қийналишди.

Ўйин тугашига 10 дақиқа қолганида "Локомотив" футболчилари ўта хавфли ҳужум уюштиришди. Қанотдан узатиб берилган тўпга жарима майдончаси ичида Музаффақр Умрзоқов зарба берди. Дарвоза тўсинига тагига кириб бораётган тўпни Эркин Жабборов муштлари билан уриб, майдон ташқарисига чиқариб юборди.

Ўйиннинг сўнгги дақиқаларида Тожиев жарима майдончаси чизиғи устида тўпни қабул қилиб олиб, уни Абдуллаевга узатди. Садриддин эса жарима майдончасига ёриб кириб, ўзи зарба бериши мумкин бўлган вазиятда, янада қулайроқ вазиятда турган Иномовга тўпни етказди. Исломнинг ўткир бурчак остида берган зарбаси эса ноаниқ чиқди.

Ҳакам ўйинга 4 дақиқа қўшиб берганини кўрсатганидан бир дақиқа ўтар-ўтмас Санъат Шихов дарвогача 25 метрлардан кучли зарба берди ва тўп дарвоза устунига тегиб, тўрга бориб тушди.

Шу тариқа "Қизилқум" кетма-кет иккинчи марта сафардан ғалаба билан қайтаётган бўлса, "Локомотив" кетма-кет иккинчи марта мағлубият аламини тортишга мажбур бўлди.

ОЛИЙ ЛИГА, 12-ТУР.
"ЛОКОМОТИВ" - "ҚИЗИЛҚУМ" - 0:1 (0:0)
Гол: Санъат Шихов (90+1)
Огоҳлантиришлар: Ромик Хачатрян (32), Дилшод Раҳматуллаев (70), лёр Жаҳонов (90+2) — Ғулом Ўрунов (32), Шерали Жўраев (63), Дилшод Жабборов (75)
"Локомотив": Азиз Ашуров, Ислом Иномов, Садриддин Абдуллаев, Зайниддин Тожиев, Ромик Хачатрян (Дилшод Раҳматуллаев 62), Музаффар Умрзоқов, Ислом Тўхтахўжаев, Шерзод Шарипов, Дилшод Жабборов, Собир Усмонхўжаев (Бахтиёр Ашурматов 85), Николай Гурьянов (Элёр Жаҳонов 65)
"Қизилқум": Эркин Жабборов, Саматов, Ғулом Ўрунов, Андрей Власичев (Ф.Ҳайдаров 89), Азамат Бобожонов (Акмал Холиқов 90+2), Тўлқин Мирзаев (Феруз Бобоқулов 79), Рустам Боқиев, Шерали Жўраев, Аваз Агалиев, Илья Ильин, Санъат Шихов
Бош ҳакам: Владислав Цейтлин