"Шахтёр" ярим ҳимоячиси Михаил Мудрик ёзда жамоасини тарк этмайди. Журналист Фабрицио Романонинг сўзларига кўра, "кончилар" украиналик футболчини белгиланган муддатдан олдин қўйиб юбориш ниятида эмас.
Аввалроқ, "Шахтёр" "Эвертон" ва "Брентфорд" клубларининг 30 миллион евролик таклифини рад этганди. Лондоннинг "Арсенал" жамоасидан қизиқиш бўлаётгани ҳақида миш-мишлар тарқалди, аммо "канонирлар" ҳозирча ҳеч қандай таклиф билан чиққани йўқ.
Эслатиб ўтамиз, Мудрик Украина чемпионатининг янги мавсумида битта самарали узатмани амалга оширганди. Футболчининг ўзи Англия Премьер-лигасига ўтишга тайёр.
Премьер-лига клубларидан ташқари ярим ҳимоячига аввалроқ Леверкузеннинг "Байер" клуби қизиқиш билдираётганди.
