“Бунёдкор” ФК Биринчи вице-президенти – Бош директори Баҳромжон Давлатов блогида янги мақола.

Ўтган ҳафтада “Бунёдкор” Фарғонада “Нефтчи” меҳмони бўлди ва ушбу баҳсдан сўнг баъзи бир вазиятлар бўйича тортишувлар юзага келди.

Шахсан мен ҳакамлар иши ҳақида гапиришни истамасдим. Биринчидан улар худди мураббий ёки футболчи сингари инсонлар. Шундай экан, ҳакамлар ҳам адашишади. Тўғри ҳатолар тасодифан бўлади, атайин кимнидир ёнини олиш учун эмас. Масалан, Европа чемпионатининг ҳал қилувчи учрашувларидан бирида Украина терма жамоасининг тоза голи венгриялик ҳакамлар ҳатоси туфайли инобатга олинмади. Агар жамоа яхши ўйнаб, рақибидан ҳар жабҳада устунлик қилган учрашувларда ҳакамларнинг ҳатолари кўзга ташланмайди.

Фарғонадаги баҳсда жамоамиз аъзоси Шавкат Саломов ўйин давомида ўз рақамини ўзгартиришга мажбур бўлди. Шавкат “Бунёдкор” сафида 2011 йилдан буён “10” рақам остида ўйнаб келади. Буни ҳамма билади. Бироқ, тушунарсиз сабаб туфайли клубимизнинг масъуллари томонидан техник хато қайд этилиб, Саломов учрашув қайдномасига “9” рақам билан киритиб юборилган. Ўйин олдидан захира ҳаками майдонга тушадиган футболчиларни текшириб чиқиши лозим. Футболчи ўйин қайдномасига бошқа рақам билан кўрсатилиб, аслида эса эгнига умуман бошқа футболкани кийиб олган бўлиши мумкин. Бу камчилик икки томоннинг эътиборсизлиги оқибатида кўздан қочирилди. Инсон идеал эмаслиги яна бир карра исботланди. Агарда, ўша вазият иккала клуб мураббийлари, учрашув назоратчиси ва бош ҳакам томонидан ўзаро маслаҳатлашилиб, зарур чоралар кўрилганида эди, ўйин пайтида рўй берган ажиотажга эҳтиёж қолмасди. Яна бир нарса, барибир қандай рақамда ўйнашидан қатъи назар майдонда Саломов тўп тепди. Ўйин пайтида янги рақам ёпиштиришнинг ёки мавжуд рақамдан бошқасини тузишни иложи йўқ. Барибир, ўша-ўша манзара бўлди...

Клубимиз делегацияси Фарғонадан қайтгач юз берган вазият муҳокама қилинди, айбдорлар жазоланди. Бундай хунук манзара клубимиз имиджига тўғри келмаслиги ва бундан кейин шу каби камчиликларга йўл қўйилмаслик алоҳида уқтирилди.

Иккинчи вазият ўйин охирларида рўй берди. Ўша ҳолатда “Нефтчи” аъзоси ўйиндан ташқари вазиятда турган эди ва буни ён чизиқ ҳаками дарҳол пайқаб, байроқчасини кўтарган ҳолда “офсайд”га ишора қилди. Айнан ўша футболчининг тўп оширишидан сўнг фарғоналиклар дарвозамизни ишғол қилишди. Учрашув видеотасмасини томоша қилгач, ўша вазиятда ҳақиқатдан ҳам “офсайд” борлигига яна бир карра амин бўлдик. Бош ҳакам ёрдамчисининг бу ишорасини анча кеч пайқади. Шунинг учун ҳам стадиондаги мухлисларнинг аксарият қисми ушбу ҳолатга эътироз билдиришди. Мен бу вазиятдан четлаб ўтишга мажбурман. Чунки ҳакамлар ишини таҳлил қилувчи ва уларга баҳо берувчи ПФЛнинг назоратчилари бор. Шунчаки, мухлислар бирон-бир фикр билдираётган қарорларига нисбатан холисроқ бўлишларини истардим. Кимлардир мағзава ағдаришни бошлади: Марат Исмоилов “Бунёдкор” ҳаками! Кечириб қўясизлар, азиз дўстлар! Агар яхши эсласангиз, айнан унинг бош ҳакамлигида мамлакат кубогининг ҳал қилувчи финал баҳсида “Пахтакор”га ютқазиб қўйгандик. Ёки бўлмасам яқиндагина Исмоилов бошқарган баҳсда “Навбаҳор”га Косонсойда мағлуб бўлгандик. Шуни алоҳида айтиб ўтмоқчиман, “Бунёдкор” бу каби “ўйин”ларда иштирок этмайди. Биз адолат ва ҳақиқат тарафдоримиз!

Сешанба куни “Жар” стадионида мамлакатимизнинг икки етакчи жамоаси ўртасидаги баҳс бўлиб ўтади. “Бунёдкор” – “Пахтакор” қарама-қаршилиги турнир жадвалидаги вазиятдан, жамоаларни ким бошқараётгани ва ундаги раҳбарларнинг ким эканликлари, жамоалар таркиби ва шу каби бошқа жиҳатлардан қатъи назар ҳамшаҳарлар баҳси доимо қизиқарли тус олиб келади. Таъкидлаб ўтмоқчиман, ҳозирги кунда ҳар иккала клуб ўртасида илиқ муносабатлар ўрнатилган.Биз фақат майдондагина рақиблармиз. Тошкент дербисини бевосита стадионда томоша қилиш учун мухлисларни “Жар” стадионига таклиф этмоқчиман. Ўйлайманки, ҳар иккала жамоа ишқибозлари ўзларининг севимли футболчиларини қўллаб-қувватлашади. Рақиб шаънига ножўя сўзлар, ҳакамлар манзилига ёмон гаплар айтилмайди. Футболнинг гўзаллиги ва жизибаси айнан мана шунда. Футбол турли хил ёшларни ва миллатларни бирлаштиради.

Миллионлар ўйинини яккакурашлар, ажойиб зарбалар, дарвозабонлар сейвлари, шунингдек турли хил кўринишдаги голлар безаб туради. Шундай экан, келинглар ажойиб футболдан баҳра олайлик.