"Реал" бир ҳафтадан кейин 37 ёшга тўладиган Лука Модрич билан шартномани узайтирмоқчи.
Marca нашрининг хабарига кўра, Мадрид клуби ярим ҳимоячи билан яна бир мавсумга шартнома имзолашдан хурсанд бўлади.
Модричнинг бу борадаги позицияси ҳозирча номаълум. Бу кўп жиҳатдан "Реал" учун мавсум қандай ўтишига боғлиқ бўлади. Луканинг қарорига унинг ўйин даражаси, жамоанинг натижалари, шунингдек, жароҳатлар таъсир қилади.
Хорватиялик футболчининг Мадрид клуби билан шартномаси шу ёзгача амалда эди, бироқ июнь ойи бошида шартнома яна бир мавсумга узайтирилди.
Модрич жорий мавсумда "Реал" сафида Ла Лиганинг учта ўйинида битта гол киритди ва битта голга ассистентлик қилди.
