"Челси" ҳимоячиси Рис Жеймс клуб билан янги шартнома имзолагани ҳақидаги таассуротлари билан ўртоқлашди.
“Янги шартнома билан еттинчи осмондаман ва мухлисларга, янги хўжайинга ва клубда иштирок этган барчага миннатдорчилик билдираман. Ишончим комилки, бизда кўплаб совринларни қўлга киритиш имконияти бўлади. Мен бу клубни қўллаб-қувватлаб ўсганман, олти ёшимдан бери шу ердаман. Мен янги шартнома имзоладим, чунки бу мен бўлишни истаган клуб. Олдинда бизни ёрқин келажак кутмоқда", - деди Жеймс.
"Челси" 22 ёшли инглиз футболчиси билан 5 йиллик шартнома имзолади.
Жеймс "Челси" тарбияланувчиси ҳисобланади. Ҳимоячи жорий мавсумда АПЛда 5 та ўйинда майдонга тушиб, 1 та гол урди ва 1 та голли узатмани амалга оширди. Transfermarkt портали футболчининг нархини 60 миллион еврога баҳоламоқда.
