Ҳа у жудаям қайсар, ҳа у жудаям ғалати, ҳа бутунлай бошқача, ҳа у ҳеч кимга ўхшамайди, лекин унинг иқтидорли эканига ҳеч ким шубҳа қилмайди. Унга ишонишади. У эса керак пайтда пайдо бўлади. Шунинг учун ҳам уни СуперМарио дейишади.

Учрашувнинг дастлабки дақиқалариданоқ Италия терма жамоасининг ўйини нисбатан Германиядан кучлироқлиги сезилиб қолганди. Умуман ўйиндан ўйинга кучайиб бораётган Скуадра Адзурра бу тараққиётнинг давоми ўлароқ янада ҳужумкор жамоага айланди. Бунинг натижасида улар тезда ҳисобда олдинга чиқиб олишди. Антонио Кассанонинг  оширмасини ҳимоячилар эътиборидан четда қолган Марио Балотелли дарвозага жойлаб қўйди.

Иккинчи гол эса чемпионатнинг безакларидан бири бўлди. Рикардо Монтоливонинг тўп узатишидан кейин дарвозабон билан яккама-якка чиқиб борган Балотелли чамаси 16 метрлардан шундай кучли зарба йўлладики, Нойер тўпга ташланишга ҳам улгургани йўқ. Бу пайти футболкасини ечган ва мушакларини намойиш қилаётган Балотеллини кўриш, эҳтиросга берилиб кетиб гол муаллифини "Супер Марио" дея эълон қилган стадион суҳандонини эшитиш мумкин эди...

Ўйиннинг сўнгги дақиқаларига келиб Германия терма жамоаси пенальти тепиш имкониятига эга бўлди. Ўзилнинг голи вазиятни ўзгартирмади. Энди кеч бўлганди... Италия Балотелли "номидаги" чемпионат финалига йўлланмани қўлга киритди.

Евро-2012. 1/2 финал
ГЕРМАНИЯ – ИТАЛИЯ 1:2 (0:2)
Голлар: Ўзил (90+2, пенальти) Балотелли (20, 36).

Германия: Нойер, Дж. Боатенг (Мюллер, 71), Хуммельс, Бадштубер, Лам, Швайнштайгер, Хедира, Кроос, Озил, Подольски (Ройс, 46), Гомес (Клозе, 46).
Италия: Буффон, Бальдзаретти, Бардзальи, Бонуччи, Кьеллини, Пирло, Маркизио, Монтоливо (Т. Мотта, 64), Де Росси, Балотелли (Ди Натале, 70), Кассано (Диаманти, 58).
Огоҳлантиришлар: Балотелли (37), Бонуччи (60), Де Росси (84), Т. Мотта (89), Хуммельс (90).