"Манчестер Юнайтед" ва Англия терма жамоасининг собиқ ҳимоячиси Рио Фердинанд "Челси" хўжайинлари германиялик мураббий Томас Тухелга халақит бергани ҳақида гапирди.
Фердинанднинг Daily Mail нашрига айтишича, Лондон жамоаси бошлиқлари мураббийлар штаби ҳал қиладиган ишларга бурун тиқишган. Собиқ футболчининг таъкидлашича, "кўклар"нинг янги раҳбарияти ҳаттоки асосий таркибни танлашга ҳам таъсир ўтказишга ҳаракат қилган.
"Тухель ўзининг феъл-атвори ва тамойиллари билан бундай ҳатти-ҳаракатни шунчаки қабул қилмади, чунки бу, албатта, хўжайинлар айтганидек ўзини тутадиган одам эмас" - дея қўшимча қилди Фердинанд.
Эслатиб ўтамиз, немис мутахассиси кутилмаганда четлатилди. "Брайтон" устози Грем Поттер яқинда расман "Челси"нинг янги бош мураббийи этиб тайинланди.