"Бавария" ҳимоячиси Лука Эрнандес жароҳати сабаб бир ойдан кўпроқ вақтни ўтказиб юборади.

Футболчи Чемпионлар лигаси гуруҳ босқичи 2-тури доирасидаги “Барселона”га қарши учрашувда (2:0) жароҳат олганди.

Мюнхен клубининг хабар беришича, текширув франциялик футболчининг қўшимча мушак жароҳатини аниқлаган. L'Equipe нашри хабарига кўра, у тахминан беш ҳафтани ўтказиб юборади.

Шу тариқа Эрнандес Франция терма жамоасининг Миллатлар лигасидаги навбатдаги ўйинларини ўтказиб юборади. Дидье Дешам шогирдлари 22 сентябрь куни Австрия, 25 сентябрь куни эса Дания билан ўйнайди.

"Бавария" ушбу ўйинда жароҳат олган Дайот Упамекано ва Бенжамин Паварднинг ҳолати ҳақида ҳам хабар берди. Ҳимоячиларнинг жароҳатлари жиддий эмас эди, улар яқин кунларда машғулотларга қайтишади.