Франция полицияси “Ювентус” ярим ҳимоячиси Поль Погбанинг акаси Матиа Погбани шантаж ва товламачиликда айблаб қўлга олди, деб хабар беради RMC Sport.
Манбага кўра, Матиа Погба ва яна уч кишини 14 сентябрь, чоршанба куни Париж чеккаси Нантерре полицияси қўлга олган.
Олдинроқ “Ювентус” ярим ҳимоячиси уюшган жиноий гуруҳ томонидан товламачилик ва таҳдидлар қурбони бўлганини айтганди. Маълум бўлишича, Погбанинг бу жиноий гуруҳга кирувчи акаси уни 13 миллион еврога яқин пулни шантаж орқали қўлга киритган.
16 июль куни Поль Турин прокуратурасига ариза билан мурожаат қилди. Август ойида ўтказилган дастлабки терговдан сўнг Париж прокуратураси ҳозирча номаълум шахсга нисбатан шантаж, одам ўғирлаш ва жиноий фитнада иштирок этиш каби айбловларни кўриб чиқишини айтди.
