Туриннинг “Ювентус” клуби раҳбарияти Чемпионлар лигасидаги омадсиз стартдан кейин жамоа бош мураббийи Массимилиано Аллегрини истеъфога чиқаришни режалаштирмаяпти.
Гуруҳ босқичининг 2-туридан ўрин олган уй учрашувида “кекса синьора” ўз майдонида Лиссабоннинг “Бенфика” жамоасини қабул қилиб, 1:2 ҳисобида мағлуб бўлди.
Sky Sport Italia нашрининг маълум қилишича, клуб раҳбариятининг жамоа қайд этаётган натижаларидан ҳафсаласи пир бўлган, бироқ айни пайтда улар ҳозирги мураббийлар штабига ишонишади. "Ювентус" раҳбарлари вазиятни тўғирлаш учун Аллегрига вақт беришади.
Эслатиб ўтамиз, туринликлар биринчи турда сафарда "ПСЖ"га (1:2) мағлуб бўлганди. Чемпионлар лигасининг навбатдаги учрашувида “Ювентус” “Маккаби” (Хайфа) билан учрашади.
