Мадриднинг “Реал” клуби вингери Марко Асенсио келаси ёзда текинга ўз клубини алмаштириши мумкин.
Август ойида 26 ёшли футболчи "Реал"ни тарк этиш ҳақида ўйлаган эди, бироқ ўзига мос вариантларни топа олмади.
Олдинроқ испаниялик футболчига "Милан" ва Лондоннинг "Арсенал" клубларидан қизиқиш бўлгани хабар қилинганди ва бу ҳам аниқ натижа бермади.
Асенсионинг шартномаси 2022/23 йилги мавсум охирида тугайди ва инсайдер Фабрицио Романонинг сўзларига кўра, бир қанча клублар футболчини келаси ёзда эркин агент сифатида жамоасига таклиф қилиш имкониятини фаол равишда ўрганмоқда. Қайси клублар ҳақида гап кетаётгани ҳозирча аниқ эмас.
Жорий мавсумда Марко Асенсио битта гол урган.
