Трансфер ойнаси ёпилганига 20 кун бўлди, демак, Хави асосий таркиб борасида бир қарорга келган деб тахмин қилиш мумкин. Бу борада турли қарашлар мавжуд эди. Чунки "Барселона" ёзда яхшигина трансферларни амалга оширди ва уларда савияли ҳамда рақобатбардош таркиб вужудга келди. Хавининг асосий таркиби қандай кўриниш олмоқда? Қуйида шу ҳақида сўз юритамиз.

Дарвозада, шубҳасиз, Тер Штеген.

Мудофаа

Алекс Балде Хорди Альбанинг ўрнини эгаллаб, асосий чап қанот ҳимоячиси позициясига жойлашмоқда. Бироқ, Хави айтганидек, ротациялар бўлади.

Ўнгда Хави Беллерин ёки Серхи Робертодан кўра Жюль Кундени афзал кўрмоқда. Кунде ҳозирча ишончни оқлаяпти дейишимиз мумкин. 

Марказий ҳимояда ўрни аниқ ягона футболчи Рональд Араухо ҳисобланади. Унинг ёнида кўпроқ Эрик Гарсияни кўряпмиз. Аммо бу унинг асосий таркиб футболчиси дейишимизга камлик қилади. Шунингдек, унга Андреас Кристиансен ва  Жерар Пике рақобат таклиф қила олади.  

Ярим ҳимоя

Френки де Йонг аста-секин Серхио Бускетсни таянч ярим ҳимоячи сифатида алмаштириши мумкин. Шунга қарамай, Бускетс ўйнаяпти ва бу позицияда асосий футболчи у бўлиши шубҳасиз. Пяничнинг кетиши эса де Йонгга билдирилаётган ишончга ҳам боғлиқ. 

Педри ва Гави асосий марказий ярим ҳимоячилар ҳисобланади. Франк Кессиэ захира ўриндиғи футболчиси сифатида кўрилмоқда ва улардан бирини мунтазам равишда алмаштиради.

Ҳужум

Хавининг асосий ҳужум учлиги: Рафинья - Левандовски - Дембеле. Торрес, Фати ва Депай алмаштириш вариантлари бўлиб кўринмоқда. 

Миржалол Пардабоев таржимаси.