Бухоро вилоятида 30 минг томошабинга мўлжалланган замонавий марказий футбол стадиони қурилиши режалаштирилмоқда. Бу ҳақда вилоят футбол ассоциацияси хабар берди.
Лойиҳа Хитойнинг China CAMC Engineering компанияси томонидан амалга оширилади.
Маълум қилинишича, янги стадион Бухоро туманидаги “Боғидашт” маҳалла фуқаролар йиғини ҳудудида барпо этилади. Ҳозирда мазкур спорт мажмуаси учун лойиҳа ишлари бошлаб юборилган.
Янги стадион халқаро стандартларга жавоб берадиган замонавий инфратузилмага эга бўлиши кўзда тутилган. Иншоот нафақат футбол учрашувлари, балки йирик республика ва халқаро спорт мусобақаларига ҳам мезбонлик қилиши кутилмоқда.













