Transfer oynasi yopilganiga 20 kun bo‘ldi, demak, Xavi asosiy tarkib borasida bir qarorga kelgan deb taxmin qilish mumkin. Bu borada turli qarashlar mavjud edi. Chunki "Barselona" yozda yaxshigina transferlarni amalga oshirdi va ularda saviyali hamda raqobatbardosh tarkib vujudga keldi. Xavining asosiy tarkibi qanday ko‘rinish olmoqda? Quyida shu haqida so‘z yuritamiz.
Darvozada, shubhasiz, Ter Shtegen.
Mudofaa
Aleks Balde Xordi Albaning o‘rnini egallab, asosiy chap qanot himoyachisi pozisiyasiga joylashmoqda. Biroq, Xavi aytganidek, rotasiyalar bo‘ladi.
O‘ngda Xavi Bellerin yoki Serxi Robertodan ko‘ra Jyul Kundeni afzal ko‘rmoqda. Kunde hozircha ishonchni oqlayapti deyishimiz mumkin.
Markaziy himoyada o‘rni aniq yagona futbolchi Ronald Arauxo hisoblanadi. Uning yonida ko‘proq Erik Garsiyani ko‘ryapmiz. Ammo bu uning asosiy tarkib futbolchisi deyishimizga kamlik qiladi. Shuningdek, unga Andreas Kristiansen va Jerar Pike raqobat taklif qila oladi.
Yarim himoya
Frenki de Yong asta-sekin Serxio Busketsni tayanch yarim himoyachi sifatida almashtirishi mumkin. Shunga qaramay, Buskets o‘ynayapti va bu pozisiyada asosiy futbolchi u bo‘lishi shubhasiz. Pyanichning ketishi esa de Yongga bildirilayotgan ishonchga ham bog‘liq.
Pedri va Gavi asosiy markaziy yarim himoyachilar hisoblanadi. Frank Kessie zaxira o‘rindig‘i futbolchisi sifatida ko‘rilmoqda va ulardan birini muntazam ravishda almashtiradi.
Hujum
Xavining asosiy hujum uchligi: Rafinya - Levandovski - Dembele. Torres, Fati va Depay almashtirish variantlari bo‘lib ko‘rinmoqda.
Mirjalol Pardaboyev tarjimasi.
