Ҳужумчи Килиан Мбаппе жамоа фотосессиясига боришни истамаганидан сўнг Франция футбол федерацияси махсус баёнот билан чиқди.
Мбаппе федерация футболчининг имиджига оид конвенсияни ўзгартиришни истамаганидан сўнг Франция терма жамоаси учун режалаштирилган фотосессиядан воз кечишга қарор қилди.
"Франция терма жамоаси раҳбарлари, президент, бош мураббий ва маркетинг менежери иштирокидаги узоқ муҳокамалардан сўнг, Франция футбол федерацияси имидж ҳуқуқлари бўйича келишувни имкон қадар тезроқ кўриб чиқишга интилади", - дейилади ташкилот сайтида.
22 сентябрь куни “уч ранглилар” Миллатлар лигаси доирасида Австрия билан ўз уйида, 25 сентябрь куни эса Дания билан меҳмонда майдонга тушишади.
