Transfermarkt портали Мадриднинг "Реал" клуби бир қатор футболчиларининг нархлари ҳақида маълумот берди.

Унга кўра, Эден Азарнинг бозор қиймати пасайишда давом этмоқда. Ҳозирда бельгиялик футболчи 12 миллион еврога баҳоланмоқда - бу унинг профессионал фаолияти бошланганидан бери энг паст кўрсаткичлардан бири.

Азар энг юқори чўққига 2018 йилда эришган, ўшанда Эден Премьер-лиганинг энг яхши футболчиларидан бири бўлган ва унинг бозор қиймати 150 миллион еврога баҳоланган. Маълум бўлишича, ярим ҳимоячининг нархи 92 фоизга арзонлашган.

Ажабланарлиси шундаки, Тони Кроос ҳам нархи сезиларли даражада тушиб кетган "Реал Мадрид" футболчилари рўйхатидан жой олди. Немиснинг қиймати 75 фоизга пасайган (2018 йилдаги 80 миллион евро ўрнига 20 миллион евро).

Дани Карвахаль (60 миллион евро ўрнига 18 миллион евро) тўрт йил ичида бозор қийматининг 70 фоизини йўқотди.

Мариано Диас ва Альваро Одриосола жамоадошлари билан бир қайиқда. Марианонинг нархи ҳозир 4 миллион евро, ҳужумчи фаолиятининг чўққисига чиққан "Лион"да унинг нархи 22 миллион еврога баҳоланган. Одриосоланинг нархи 66 фоизга камайди, ҳозир унинг нархи 10 миллион евро, 2018 йилда Альваро 30 миллион еврога тенг эди.