"Челси" америкалик бизнесман Тодд Бёли қўлига ўтганидан кейин кўп нарса ўзгариши кутилмоқда. Шундай ўзгаришлардан бири Томас Тухелнинг ишдан олиниши бўлди. Қуйида янги мураббий Грэм Поттернинг амалга ошириши мумкин бўлган еттита харид ҳақида гап боради.
Неймар – "ПСЖ"
Ўтган ёз давомида Неймарнинг "Челси"га ўтиши билан боғлиқ хабарлар катта шов-шувларга сабаб бўлган эди. Бунга сабаблар етарли. Негаки, Париж клубида Неймар ва Мбаппе ўртасида келишмовчилик содир бўлган. Бу қарама-қаршиликнинг Мбаппе фойдасига ҳал бўлиш эҳтимоли катта. Айнан шу сабаб Неймар "ПСЖ"дан кетгани маъқул. У учун яхши манзил эса "Челси" бўлади.
Гонсало Монтиель – "Севилья"
"Челси" ёзда ўнг қанот ҳимоячиси харид қилишга уринди. Ҳа, жамоада Рис Жеймсдек ишончли вакил бор. Лекин захира варианти зарар қилмайди. Шу сабаб "Интер"дан Дензел Дюмфрисни олиб келишга уринилди. Аммо бу иш амалга ошмади. Поттер ҳали ҳам бу борада изланишларини давом эттирмоқда. "Севилья" футболчиси Монтиель аллақачон "Челси" радарига тушиб улгурган. Аргентиналик ҳимоячи "Челси"нинг 3-5-2 схемасига айнан мос тушади.
Демирал ва Пашалич – "Аталанта"
Демирал эндигина "Аталанта"да доимий ўйнай бошлади. У ўтган мавсумни "Ювентус"да ижара асосида ўтказган эди. Туркиялик ҳимоячи ўзини ҳар тарафдан яхши кўрсата олмоқда. Шу сабаб тез орада "Челси" томонидан харид қилиниши мумкин. Айни жамоадаги иккинчи номзод эса Пашаличдир. Яқин ўтмишда "Челси"дан кетган футболчи, Италияда порлай олди. Пашалич 6 йил давомида "аристократлар" сафида эди. 2020 йилда эса "Аталанта"га сотиб юборилади. Унинг Хорватия терма жамоасидаги ўрни ҳам мустаҳкамланган.
Энцо Фернандес – "Бенфика"
"Бенфика" "Ливерпуль" ҳамда "МЮ"ни ортда қолдириб, "Ривер Плейт"дан ёзда Фернандесни сотиб олди. 21 ёшли марказий ҳимоячи Европадаги энг ёрқин талантлардан бири ҳисобланади. Шу сабаб португал клуби уни узоқ вақт сақлаб қола олмаслиги мумкин. Чунки гигантларнинг Аргентина терма жамоаси аъзосига бўлган қизиқиши ўта кучли. Улар ичида "Челси" энг асосий даъвогардир.
Бренден Эронсон ва Иллан Мелье – "Лидс"
2020 йил "Лидс" учун ўта ёрқин бошланган. Жамоа АПЛда ҳаракат қила бошлади. Аммо у ерда қолиш осон эмас. Ўз футболчиларини олиб қолиш ҳам. "Челси" айни дамда америкалик ярим ҳимоячи Эронсонга кучли қизиқиш билан қарамоқда. Эдуар Мендини ўрнини босиш учун эса "Лидс"нинг 22 ёшли дарвозабони Мелье танланиши кутилмоқда. "Челси" ушбу жуфтликни кейинги ёз учун рўйхатига қўшиб қўйган.
ИСМАТОВ Ж.
