Европа чемпионати ўз ниҳоясига етгач Хорватия терма жамоаси бош мураббийи Славен Билич терма жамоани тарк этиши ҳақида сайтимиз орқали хабар бериб ўтган эдик. Билич Москванинг "Локомотив" клуби бош мураббийлигига кетгандан сўнг унинг терма жамоадаги ўрни бўш қолган ва Хорватия футбол федерацияси унинг ўрнига муносиб номзод излаётган эди. Ва ниҳоят, Хорватия терма жамоасига бош мураббий тайинланди. Эндиликда 44 ёшли Игор Штимац Хорватия терма жамоасини Баризилияда бўлиб ўтадиган жаҳон чемпионатига тайёрлайди.
Эслатиб ўтамиз, Хорватия терма жамоаси Жаҳон чемпионати саралаш баҳслари доирасида 7 сентябрь куни Македония термасига қарши майдонга тушади. Шунингдек, ушбу иккала жамоа билан бирга "А" гуруҳида Уэльс, Сербия, Белгия ва Шотландия терма жамоалари ҳам ўрин олган.













