"Милан" ҳимоячиси Тео Эрнандес умумий гуруҳ билан машғулотларни бошлади ва у 8 октябрь, шанба куни бўлиб ўтадиган "Ювентус"га қарши А Серия 9-тур ўйинида майдонга тушиши мумкин. Бу ҳақда Football Italia портали Sky Sports нашрига асосланиб хабар бермоқда.
24 ёшли француз терма жамоаси бош мураббийи Дидье Дешам томонидан Миллатлар лигасининг сўнгги босқичига чақирилди, аммо сўнгги бир неча ҳафтани жароҳат сабаб ўтказиб юборишга мажбур бўлган. Эрнандес Италия А сериясида “Эмполи” (3:1) ва Чемпионлар лигасида “Челси”га (0:3) қарши ўйинларни ўтказиб юборди.
Ҳимоячи Милан клубида 2019 йилдан буён ўйнаб келмоқда. Жорий мавсумда Эрнандес барча турнирлар доирасидаги 9 ўйинда битта гол урди ва иккита голли узатмани амалга оширди.
