Англия миллий жамоаси ва «МЮ» клуби сардори Гарри Магуайрни қандайдир «қора куч» таъқиб қилмоқдами ёки у чиндан ҳам, нўноқ ҳимоячи?
Вақтида «Лестер»нинг оламшумул чемпионлик юришида катта роль бажарган футболчи айниқса, охирги ўйинларда чинакамига омадсизлик инканжасига тушиб қолди.
Диққат қилинг, Гарри Магуайр бошланғич таркибдан жой олган охирги 10та ўйинда унинг жамоалари (Англия термаси ва «МЮ» клуби) лоақал 1та ғалаба қайд этгани йўқ. Шунча учрашувнинг самараси - 3та дуранг ва 7та мағлубият. Ваҳоланки, дейлик, «қизил иблислар» Эрик тен Хаг бошқарувида бинойидек ўйнамоқдалар, натижалари ҳам чакки эмас, фақат Магуайрсиз...
Боз устига, Гарри учрашувларда бир қатор жиддий хатоларга йўл қўймоқдаки, бунинг ортидан ижтимоий тармоқлар унга бағишланган турли-туман мемларга тўлиб кетди. Мухлислар эндиликда букмекерлик идораларига аниқ маслаҳат ҳам беришмоқда: «Аввало, таркибга қаранг, унда Гарри Магуайр бўлса, «МЮ»нинг мағлубиятига пул тикишларни қабул қилманг!»
