Angliya milliy jamoasi va «MYU» klubi sardori Garri Maguayrni qandaydir «qora kuch» ta’qib qilmoqdami yoki u chindan ham, no‘noq himoyachi?
Vaqtida «Lester»ning olamshumul chempionlik yurishida katta rol bajargan futbolchi ayniqsa, oxirgi o‘yinlarda chinakamiga omadsizlik inkanjasiga tushib qoldi.
Diqqat qiling, Garri Maguayr boshlang‘ich tarkibdan joy olgan oxirgi 10ta o‘yinda uning jamoalari (Angliya termasi va «MYU» klubi) loaqal 1ta g‘alaba qayd etgani yo‘q. Shuncha uchrashuvning samarasi - 3ta durang va 7ta mag‘lubiyat. Vaholanki, deylik, «qizil iblislar» Erik ten Xag boshqaruvida binoyidek o‘ynamoqdalar, natijalari ham chakki emas, faqat Maguayrsiz...
Boz ustiga, Garri uchrashuvlarda bir qator jiddiy xatolarga yo‘l qo‘ymoqdaki, buning ortidan ijtimoiy tarmoqlar unga bag‘ishlangan turli-tuman memlarga to‘lib ketdi. Muxlislar endilikda bukmekerlik idoralariga aniq maslahat ham berishmoqda: «Avvalo, tarkibga qarang, unda Garri Maguayr bo‘lsa, «MYU»ning mag‘lubiyatiga pul tikishlarni qabul qilmang!»
