Суперлиганинг 21-тури доирасида ўтказилган "Насаф" — "Сўғдиёна" учрашувидаги ҳакамлик борасида айрим мулоҳазаларни билдириб ўтмоқчиман.
Ильгиз Танташев қилган ишни, чиқарган қарорни шунчаки хато дейишга тил бормайди. Бундай савиядаги ҳакам (Ўзбекистоннинг 2021 йилдаги энг яхши ҳаками, бир неча йиллардан буён ФИФА ҳаками сифатида кўплаб халқаро ўйинларни бошқариб келмоқда) жуда оддий вазиятда "ёш болаларча" хато қилиши мумкин эмас. Боз устига, видеотакрорни томоша қилгач! Бу ерда бошқа нарсанинг "ҳиди" келмоқда. Ҳа, Танташев номуайян муддатга (маълумотларга қараганда — мавсум охирига қадар) четлатилди. Аммо Ильгизнинг бундай қарори ортида нималар турганини тегишли ташкилотлар аниқлаши керак, чамамда.
Бундан ташқари, ўша вазиятда Танташев дарҳол пенальти белгиламаган. Фақатгина видеоёрдамчи ҳакам (Раҳимбек Каримов)нинг тавсиясига кўра у вазиятни қайта томоша қилгач, пенальти белгилади. Аслида VARда ишлаган ҳакам видеоопрацион хонада вазиятни турли ракурслардан томоша қилгач, бош ҳакамга алоқа воситаси орқали вазият пенальтига тортмаслигини айтиб, ўйинни давом эттириш мумкинлигини етказиши керак эди. Шунда ўйин темпи бузилмаган, ортиқча вақт йўқотилмаган, футбол оммасининг эътирозига сабаб бўлмаган ва эҳтимол "Насаф" очколардан ноҳақ маҳрум бўлмаган бўларди. Айтяпманку, бу ерда қандайдир "ҳид" келяпти деб...
Тушунарсиз ҳолат
VAR сифатида ишлаган Раҳимбек Каримов билан боғлиқ 2та вазият эътиборимни тортди ва баъзи саволларни келтириб чиқарди.
Биринчидан, 26 сентябрь куни Суперлига ҳакамлари учун ўтказилган йиғилишда Раҳимбек Каримов бошқа рефери — Азиз Асимовнинг ўрнига ФИФА рефериси сифатида тавсия этиладиган бўлди. Демак, унинг савияси ўсиб бормоқда ва ФИФА ҳаками даражасига етиб қолди. Жуда яхши.
Иккинчидан, Раҳимбек Каримов Суперлиганинг 20-тури доирасида ўтказилган "Қизилқум" – "Металлург" баҳсини бошқариб борди ҳамда паст балл олгани учун ЎФА ҳакамлар қўмитасининг 4 октябрдаги қарори билан битта ўйинда дисквалификация қилинди (+жаримага тортилди).
Энди қаранг. 20-турдан сўнг битта ўйинга четлатилган ҳакам 21-турда VAR сифатида ишлаши мумкин эканда а? Дисквалификация қилинган арбитр ҳакамликнинг барча йўналишлари (бош ҳакам, захира ҳаками, VAR, AVAR, Ёшлар лигаси, Про лига, U18 чемпионатлари ҳакамлиги)дан четлатилмайдими? Эҳтимол, қўлланилган жариманинг ўрнини "тўлдириб" олиш учун шундай йўл тутишгандир?! Буниси мутасаддиларга аён. Аммо ушбу ҳакам бундай юксак ишончни оқлай олмасдан, 21-турда яна "қовун тушириб" ўтирибди.
Савол: ФИФА ҳакамлигига тавсия этилган Раҳимбек Каримов қандай ҳакам ўзи?
Якдиллик қани?
Суперлига 21-тур ўйинлари якунлангач ЎзПФЛ бош директори Диёр Имомхўжаев телеграмдаги канали орқали фикр билдирди: "Ички чемпионат ўйинларидан четлаштирилган футбол ҳаками халқаро ўйинларда ҳам ишлолмайдиган бўлиши керак. Шундагина булар ўзимизнинг футболни ҳам ҳурмат қилишни бошлайди".
Бундан кўриниб турибдики, Диёр Суперлигадаги ҳакамликдан нафақат қониқмаяпти, балки уларнинг қарорларидан жаҳли чиқмоқдаки, қўпол хатоларга йўл қўйган ҳакамларнинг фақатиган миллий чемпионатдан четлатилишидан қониқиш ҳосил қилмаяпти. Тўғрида, эндигина интрига юзага келган Суперлигадаги чемпионлик масаласи майдондаги кураш орқали эмас, ҳакамларнинг ҳурмача қилиқлари орқали ҳал бўлса, одамга алам қилади.
Назаримда, Суперлига ва ҳакамлар масаласида ЎФА ва ЎзПФЛ ўртасида якдиллик йўқдек. Аввало футбол мутасаддилари келишиб олишлари керак: Чемпионатда барча нарса майдонда ҳал бўлиши керак ва бунда ҳакамлар асло қинғир ишларга қўл урмаслиги шарт!
Олимхўжа Бўронов.
