Дубай 17-19 октябрь кунлари Жаҳон футбол лигалари ассоциацияси томонидан ўтказиладиган “Жаҳон футбол лигалари форуми-2022” тадбирига мезбонлик қилади. Унда илк марта ЎзПФЛ вакиллари Диёр Имомхўжаев ҳамда Зоҳиржон Акрамхонов иштирок этади. 

Жаҳон футбол лигалари ассоциациясига 2015 йилда асос солинган бўлиб, унинг бош қароргоҳи Швейцариянинг Цюрих шаҳрида жойлашган. Айни вақтда унга 44 мамлакат футбол лигалари аъзо ҳисобланади. ЎзПФЛ ҳамда ассоциация ўртасидаги алоқалар шу йилнинг июль ойидан бошланганди. Ўтган вақт давомида ташкилот ЎзПФЛ билан боғлиқ мусобақалар, ҳужжатлар ва бошқа материалларни ўрганиб чиқди. Шундан кейин ассоциация бош котиби Жером Перлемутер ЎзПФЛ бош директори Диёр Имомхўжаев билан сентябрь ойида алоқага чиқди ва суҳбатда лигамизни 45-аъзо сифатида қабул қилишга тайёр эканлигини маълум қилди. Шундан келиб чиқиб, айни вақтда ЎзПФЛ мазкур форумда кузатувчи мақомида иштирок этмоқда.  

Мазкур ташкилот бошқарув кенгаши раиси Мексика футбол лигаси раҳбари Энрике Бонилла ҳисобланади. Унинг ўринбосарлари сифатида Англия Премьер-лигаси раҳбари Ричард Мастерс ҳамда МЛС раҳбари Дон Гарбер фаолият олиб боради. Айни вақтда Европанинг кучли бешлик миллий чемпионатлари ҳисобланган Англия, Испания, Италия, Германия ва Франция лигаларининг барчаси Жаҳон футбол лигалари ассоциацияси аъзолари ҳисобланади. Шунингдек, Европанинг Туркия, Шотландия, Белгия, Португалия, Сербия, Дания, Руминия, Швеция, Латвия, Польша, Украина, Исроил, Греция каби мамлакатлари ҳам унга аъзодир. 

Осиё қитъасидан шу кунга қадар Австралия, БАА, Япония, Қатар, Саудия Арабистони, Малайзия, Жанубий Корея ва Таиланд мамлакатларининг футбол лигалари Жаҳон футбол лигалари ассоциацияси билан ҳамкорлик қилади.