"Реал Мадрид"нинг 30 ёшли бельгиялик дарвозабони Тибо Куртуа Франциянинг France Football газетасидан "Олтин тўп" учун овоз бериш тизимини танқид қилди.
"Ишончим комилки, дарвозабон "Олтин тўп"ни қўлга кирита олмайди. Ушбу мукофот соҳиби Карим Бензема ва биз ҳаммамиз бунга қўшиламиз. Аммо Чемпионлар лигаси ва Испания чемпионлигини қўлга киритган шундай мавсумдан сўнг, овоз беришда ўзимни еттинчи ўринда кўрдим. Бу эса дарвозабонлар ҳисобга олинмаслигидан далолат беради. Шу билан бирга кучли ўнталикда ҳимоячилар ҳам йўқ. Майли, ҳеч бўлмаганда улар яна бир совринни (Лев Яшин) ўйлаб топишди", - дейди Куртуа A Bola нашрига.
Эслатиб ўтамиз, Испания Примеранининг сўнгги мавсумида дарвозабон 36 та учрашув ўтказиб, ўз дарвозасидан 29 та гол ўтказиб юборган ва 16 та ўйинда ўз дарвозаси дахлсизлигини сақлаб қолган. Чемпионлар лигасида Куртуа 13 та ўйинда 14 та гол ўтказиб юборди ва жами 50 та сейв амалга оширди.
