"Тоттенҳэм"га қарши ўйин "Манчестер Юнайтед"нинг мавсумдаги энг яхшиси бўлганини мураббий ҳам таъкидлади. Ғалаба нафақат таблода, айниқса, тўп назорати ва ўйин сифатида ҳам кўринди. Менимча, бунинг асосий сабабларидан бири — Бруно Фернандеш.

Брунонинг аниқ паслари нисбати 93%ни ташкил қилди. Бу футболчининг ўртача кўрсаткичидан сезиларли кўп - одатда унинг аниқ паслари 70-75 фоиз атрофида бўларди. Бунинг устига у 63 маротаба узатма амалга оширган - бу ҳам жуда кўп. Бруно аввалги ўйинларда 40-50 атрофида пас амалга оширган, ҳатто "Омония"га қарши ўйинда ҳам унинг паслари 60 тага етиб бормаганди.

Брунонинг ўйин услуби, кўп рискка бориши ҳақида доим айтиб келинади, ҳатто ўз вақтида унинг трансфери палласида ҳам бу камчилик сифатида кўринган. Бруно жавобан доим риск қилишни ёқтиришини уқтириб келади ҳам.

Тен Хаг эса, ўйиндан кейин шогирдлари сабр қилишгани, рақиб имконият беришини кутиб, аниқ ўйнашга ҳаракат қилганини алоҳида таъкидлаб ўтди. Яъни мураббийнинг сўзлари Брунонинг одатий услубига бироз терс, тўғрими?

Фернандеш бу сафар кўп риск қилмади, шошилмади ва аниқ ўйнашга ҳаракат қилди. Натижада, тўпни ҳам кам йўқотди, АПЛ мавсумидаги рекорд (9) миқдорда вазият яратишга муваффақ бўлди, гол ҳам урди. Бу албатта, умуман жамоавий ўйин сифатини ҳам оширди.

"Тоттенҳэм" қарши ҳужумларда, ўтиш фазаларида анча хавфли жамоа. Айнан шу туфайли, мураббий камроқ риск қилишни ва тўп йўқотмасликни алоҳида тайинлаганми ёки Бруно аста-секин тен Хаг футболига мослашиб боряптими, вақт кўрсатади.

Қаҳрамон Асланов.