"Tottenhem"ga qarshi o‘yin "Manchester Yunayted"ning mavsumdagi eng yaxshisi bo‘lganini murabbiy ham ta’kidladi. G‘alaba nafaqat tabloda, ayniqsa, to‘p nazorati va o‘yin sifatida ham ko‘rindi. Menimcha, buning asosiy sabablaridan biri — Bruno Fernandesh.

Brunoning aniq paslari nisbati 93%ni tashkil qildi. Bu futbolchining o‘rtacha ko‘rsatkichidan sezilarli ko‘p - odatda uning aniq paslari 70-75 foiz atrofida bo‘lardi. Buning ustiga u 63 marotaba uzatma amalga oshirgan - bu ham juda ko‘p. Bruno avvalgi o‘yinlarda 40-50 atrofida pas amalga oshirgan, hatto "Omoniya"ga qarshi o‘yinda ham uning paslari 60 taga yetib bormagandi.

Brunoning o‘yin uslubi, ko‘p riskka borishi haqida doim aytib kelinadi, hatto o‘z vaqtida uning transferi pallasida ham bu kamchilik sifatida ko‘ringan. Bruno javoban doim risk qilishni yoqtirishini uqtirib keladi ham.

Ten Xag esa, o‘yindan keyin shogirdlari sabr qilishgani, raqib imkoniyat berishini kutib, aniq o‘ynashga harakat qilganini alohida ta’kidlab o‘tdi. Ya’ni murabbiyning so‘zlari Brunoning odatiy uslubiga biroz ters, to‘g‘rimi?

Fernandesh bu safar ko‘p risk qilmadi, shoshilmadi va aniq o‘ynashga harakat qildi. Natijada, to‘pni ham kam yo‘qotdi, APL mavsumidagi rekord (9) miqdorda vaziyat yaratishga muvaffaq bo‘ldi, gol ham urdi. Bu albatta, umuman jamoaviy o‘yin sifatini ham oshirdi.

"Tottenhem" qarshi hujumlarda, o‘tish fazalarida ancha xavfli jamoa. Aynan shu tufayli, murabbiy kamroq risk qilishni va to‘p yo‘qotmaslikni alohida tayinlaganmi yoki Bruno asta-sekin ten Xag futboliga moslashib boryaptimi, vaqt ko‘rsatadi.

Qahramon Aslanov.