"Барселона" ярим ҳимоячиси Френки де Йонгга "Ливерпуль", "Манчестер Юнайтед" ва "Челси" қизиқиш билдирмоқда, деб хабар беради ESPN.
Манбанинг хабарига кўра, инглиз клублари агар футболчи "Барса"ни тарк этишга рози бўлса, қишки трансфер ойнасида футболчи билан шартнома имзолашга тайёр. Эслатиб ўтамиз, манкунианликлар ўтган ёзда нидерландияликни сотиб олмоқчи бўлган, аммо кейин у клубини ўзгартиришдан бош тортганди.
25 ёшли Де Йонг жорий мавсумда “Барселона” сафида 12 та ўйинда майдонга тушиб, 1 та гол урган. Унинг клуб билан шартномаси 2026 йилнинг ёзига қадар мўлжалланган.