"Челси" бош мураббийи Грэм Поттер "Манчестер Юнайтед"га қарши АПЛ ўйинидан олдинги матбуот анжуманида жамоа ярим ҳимоячиси НГоло Канте билан боғлиқ вазият ҳақидаги саволга жавоб берди. Ҳозирда франциялик футболчи жароҳат олган ва унинг клуб билан шартномаси 2023 йилнинг 30 июнида якунига етади.

“Ҳаммамиз учун, хусусан, мен учун энг муҳими, Кантенинг операциядан кейин тикланишига, формасини тиклашига ёрдам бериш. Айнан шунга эътибор қаратилади.

Унинг олдида узоқ йўл бор. Биз учун Кантега тўғри муносабатда бўлиш, унинг формага киришига ёрдам бериш ва шундан кейин кучлироқ бўлиши муҳим. У яна футболдан завқлана олса, шартнома масаласи ҳақида ўйлашимиз мумкин", - дея Поттернинг сўзларини келтиради "Челси" расмий сайти.

НГоло Канте тиззасидан олган жароҳати туфайли операция қилинди. Футболчининг тикланиши учун тахминан уч ой вақт кетади. Франциялик ярим ҳимоячи Қатардаги жаҳон чемпионатини ўтказиб юборади. Жорий мавсумда у "Челси"нинг иккита ўйинида қатнашишга муваффақ бўлди.