“Манчестер Юнайтед” ҳужумчиси Маркус Рэшфорд Британиянинг Африка, Афро-Кариб денгизи ва Африка-Америка миллатига мансуб энг нуфузли одамларидан бири деб топилди, деб хабар беради клуб расмий сайти.
Рўйхат 2007 йилдан буён ҳар йили эълон қилиниб, ёшларга ўрнак бўла оладиган қора танлилар билан жамоатчиликни таништириб келинмоқда. Рўйхатдаги одамлар мустақил ҳакамлар ҳайъати томонидан танланади. Бу йил рўйхатга Рэшфорддан ташқари актёр сер Ленни Генри ва репер Stormzy ҳам кирди.
Маркус Рэшфорд ўтган йили COVID-19 пандемияси даврида болаларга бўлган ғамхўрлиги учун ҳам мукофот билан тақдирланган эди.
Англиялик футболчи “Манчестер Юнайтед” сафида 317 та ўйинда майдонга тушиб, 99 та гол урган ва 60 та голли узатмани амалга оширган.
