АҚШнинг "Интер Майами" директори Крис Хендерсон "ПСЖ" ҳужумчиси Лионель Месси билан шартнома имзолагани ҳақидаги миш-мишларга жавоб берди.
“Месси дунёнинг исталган жамоасини ўзгартиради. Мен у ҳақида тахмин қилиш ва жамоамиз ҳақида гапиришни истамайман, лекин у ҳар бир лигани ва ўйнайдиган ҳар бир жамоани ўзгартиради", - деди Хендерсон Goal портали билан суҳбатда.
Аввалроқ 35 ёшли Месси "ПСЖ" билан шартномасини узайтирмаслиги (2023 йилнинг ёзигача) ва фаолиятини “Интер Майами”да давом эттириши ҳақида хабар берилганди. Кейинроқ Мессининг МЛС клубига ўтиши Аргентина Жаҳон чемпионатида ғалаба қозонган тақдирдагина амалга ошиши мумкинлиги маълум қилинганди.
Месси 2021 йилнинг ёзидан буён “ПСЖ” сафида тўп суради. Бунгача у бутун фаолиятини "Барселона"да ўтказган. Ҳужумчи жорий мавсумда 18 ўйинда 12 та гол урди ва 14 та голли узатмани амалга оширди.
