Англиянинг "Манчестер Сити" клуби раҳбарияти бош мураббий Хосеп Гвардиола жамоа билан шартномани 2025 йилгача узайтиришига умид қилмоқда. Бу ҳақда 90min нашри хабар бермоқда.

2016 йилда жамоани қабул қилиб олганидан бери "Манчестер Сити" билан тўрт марта чемпионликни қўлга киритган испаниялик мураббий ва клуб раҳбарияти ўртасидаги шартномани узайтириш бўйича музокаралар бир неча ойдан бери давом этмоқда. Амалдаги шартнома 2022/2023 йилги мавсум якунида тугайди.

Айни дамда томонлар янги шартномага тааллуқли дастлабки келишувга эришдилар. Унга кўра, Гвардиола 2025 йилгача мураббийлик курсида қолади. Жамоа устози шу йил охиригача янги шартнома имзолаши кутилмоқда.

Аввалроқ, "Манчестер Сити" ҳозирда Гвардиоланинг ёзда жамоани тарк этиш вариантини кўриб чиқмаётгани ва испаниялик мутахассис "шаҳарликлар" бош мураббийи бўлиб қолиши асосида ўз келажак режаларини қураётгани хабар қилинганди.