"Милан" футбол клубининг собиқ ярим ҳимоячиси Кака "Наполи"нинг грузиялик футболчиси Хвича Кварацхелиянинг ўйинлари ҳақида фикр билдирди.
"Кварацхелия? Бу йигит жуда яхши. Унинг ўйини ёқимли сюрприз. Афсуски, у ва Холанд жаҳон чемпионатида ўйнамайди. Фантастик футболчилар мени доим ҳайратда қолдиради. Бошқалар кўрмайдиган ечим топадиган бундай ўйинчилар катта аҳамиятга эга", - деди бразилиялик собиқ футболчи La Gazzetta dello Sport билан суҳбатда.
21 ёшли Кварацхелия шу йилнинг ёзида Грузиянинг "Динамо" жамоасидан "Наполи"га ўтган эди. Неаполликлар сафида ҳужумчи Италия А Серияси ва Чемпионлар лигасининг 17 та учрашувида майдонга тушиб, 8 та гол урди ва 8 та голли узатмани амалга оширди. Кварацхелия тўп сурадиган Грузия терма жамоаси 2022 йилда Қатарда бўлиб ўтадиган жаҳон чемпионатида иштирок этмайди.
