"Милан" франциялик ҳужумчи Оливье Жирунинг ўйинларидан мамнун. Тажрибали ҳужумчига янги шартнома таклиф қилинади.
Нуфузли журналист ва инсайдер Фабрицио Романонинг ижтимоий тармоқларда хабар беришича, гап "1+1" кўринишидаги шартнома ҳақида кетяпти.
Қайд этилишича, айни дамда Оливье Жирунинг барча эътибори жаҳон чемпионатига қаратилган. 36 ёшли ҳужумчи миланликлар билан янги шартнома борасида кейинроқ муҳокама қила бошлайди.
2022/2023 йилги мавсумда Оливье Жиру “Милан” сафида барча мусобақаларда 18 та ўйинда майдонга тушди. Франциялик футболчи тўққизта гол урди ва шерикларига тўртта голли узатма амалга оширди.
"Милан" айни дамда А Серия турнир жадвалида иккинчи ўринда бормоқда.
