Бу йил Ўзбекистон ҳудудида биринчи футбол жамоаси тузилганига 100 йил тўлади. Шу қутлуғ санага бағишланган асосий байрам тантаналари қачон ўтказилишининг тахминий санаси, ва ниҳоят, ўтган ҳафта эълон қилинди. 28 август куни нафақат тўй, балки ўзбек футболи тарихидаги энг чиройли стадион очилишига ҳам гувоҳ бўлишимиз мумкинлиги бизни бироз хурсанд қилади.

Лекин юртимизда бу йил ўзбек футбол бир асрлик тўйини нишонлайдиган бир нафас сезилмаётгандек. Кишида шундай тасаввур уйғонади-ки, футболимиз 2011 йилдаги муваффақиятлардан сўнг бир инқироз ҳолатига тушиб қолгандек.

Ўзингиз ўйланг.

Агар мартнинг ўша оқшомида Ўзбекистон олимпия терма жамоаси БААни мағлубиятга учрата олганида, футболчиларимиз бугун Лондонга кетишарди. Биз уларнинг Британиядаги ўйинларини орзиқиб кутаётган, уларнинг муваффақиятга эришишларини ният қилаётган бўлардик. Айнан шу терма жамоа энг биринчи галда ҳақиқий футбол байрами руҳини берган бўларди... Лекин биринчи бўлиб айнан шу жамоа байрам руҳини ўлдирди...

Вадим Абрамов олимпиячиларни Олимпиадага олиб чиқолмаганидан кейин, барча умид миллий терма жамоага қаратилганди. Лекин Эронга ютқаздик. Кейин кутилмаганда терма жамоани, эски одатларимизга хилоф қилмаган ҳолда, кечувда алмаштирдик. Қосимов қўл остида жамоа ғалаба билан қайтиши керак бўлган ўйиндан бор-йўғи бир очко ишлаб келди. Бу йўлдаги истиқболимиз ҳам туманда, афтидан, ЖЧ-2014ни ҳам футболчиларимиз томошабин сифатида кузатишади, шекилли... Байрам руҳини синдирган иккинчи омил шу бўлди...

Ўзбекистон Олий Лигаси ўйинларига бўлган қизиқиш борган сари пасайиб бормоқда. Терма жамоа аъзолари тўп сурадиган энг кучли клублар Тошкентда бўлгани ҳолда бу шаҳардаги “Бунёдкор”, “Пахтакор” ва “Локомотив”нинг ўйинларига нари борса икки минг томошабин келмоқда, холос. Авваллари вилоятларда кўпроқ томошабин стадионга тушарди, ҳозир эса Қашқадарёнинг бош жамоаси – “Насаф”нинг ўйинига ҳам бор-йўғи минг нафар одам келмоқда...

Кеча футбол агенти Санъат Шарипов ўз твиттерида ўзбекистонлик футболчиларни танқид қилиб ёзиб, уларда мотивация йўқлиги, битта машина, битта уй, битта фирма очиш билан уларда футболга бўлган қизиқиш сўниши, ортиқ хоҳиш қолмаслигини билдирган. Унинг фикрларига қўшилгинг келади: Олий Лиганинг энг яхши тўпурари ва тўпурарлари ёши қирққа қараб кетаётган қария футболчилар, 2000-йилларнинг бошидагидек портлаб чиқадиган Нодир Қўзибоев, Марат Бикмаев, Элдор Магдеев, Садриддин Абдуллаев каби ёшлар эса деярли йўқ...

Ҳамма футболдан чарчаган, футболнинг ўзи биз, ўзбекистонликлардан чарчагандек...

Катта тўйнинг шукуҳи эса, негадир, сезилмаётгандек...