Мамлакатимиз чемпионати 2-давра мусобқаларига қизғин тайёргарлик кўраётган Муборакнинг “Машъал” жамоаси бош мураббийи Владимир Фомичевга мухлисларимиз қизиқтирган бир неча саволлар билан мурожаат қилдик ва ўртамизда қисқача суҳбат бўлиб ўтди.

Шуниси ҳурматга сазоворки, Владимир Александровичга қайси пайт мурожаат қилсак, доимо саволларимизга жавоб берган. Бу сафар ҳам шундай бўлди.

— Владимир Александрович, иккинчи даврага тайёргарликлар қандай давом этаяпти?
— Бизнинг давралар оралиғидаги тайёргарликларимиз ўз ниҳоясига етиб бормоқда. Олдимизда Ўзбекистон Кубоги чорак финалининг жавоб учрашуви турибди. Бу учрашувда мамлакатимизнинг амалдаги чемпионига қарши майдонга тушамиз. Дастлабки учрашув натижасидан хабарингиз бор, албатта жавоб учрашувида чемпион жамоани йирик ҳисобда мағлубиятга учратиш қийин масала, ўйламанки, ҳеч бўлмаганда ушбу учрашув Наманганнинг “Навбаҳор” жамоаси билан бўладиган ўйин олдидан бизга катта синов вазифасини ўтаб беради.

— “Машъал” таркибидаги ўзгаришлар аниқ бўлдими?
— Таркибимизда бир қатор ўзгаришлар бўлиши аниқ. Янгиердан таклиф этилган Жамшид Ҳасанов таркибимизга қўшилиши мумкин. “Бунёдкор” жамоаси аъзоси Янис Миндзукас ҳам иккинчи давра мобайнида сафимизда ижара асосида тўп суради. Сербиялик ҳужумчи Микола Стробатс ҳам бизда илк уртоқлик учрашувида яхши таасурот қолдирди, ҳозир ушбу ўйинчини трансфер масаласи кўрилмоқда, агар келишувга эришсак, у ҳам сафимизга қўшилиши мумкин.

— Илья Фомичев “Машъал” сафига қайтиши мумкинми?
— Ҳа, у сафимизга қайтади.

— Саволларимизга жавоб берганингиз учун Сизга ташаккуур билдирамиз.
— Сизларга ҳам раҳмат, ижодий ишларингизга муваффақиятлар тилайман.

Суҳбатни Ренат Эрназаров олиб борди.