Иккинчи даврага тайёргарлик кўриш давомида «Андижон»га бир қатор янги футболчилар таклиф этилди. Бундан кўзланган мақсад шуки, мавсумнинг иккинчи ярмини муваффақиятли ўтказишдан иборат.

Шу боис ҳам таркибга тажрибали ўйинчилар жалб қилинди. Натижада улар билан шартномалар имзоланди. Шундай қилиб грузиялик дарвозабон Михаил Алавидзе «Андижон» аъзосига айланди. Бундан ташқари яқинда «Бухоро»ни тарк этган Юрий Цой ҳам яна «Андижон»га қайтди. Ёдингизда бўлса, у 2008 йили «Бургутлар» шарафини муносиб ҳимоя қилганди. Умуман айтганда, энди дарвозабонлар борасида ортиқча ташвишга тушмаса ҳам бўлади. Чунки Цой билан ҳам шартнома имзоланди.

Шунингдек, янги таклиф қилинган иқтидорли ҳимоячи Жасур Ўрунов бир неча кун давомида «Андижон» йиғинида қатнашди. У ўз вақтида «Насаф», «Металлург», «Машъал», «Ерқўрғон» каби жамоаларда тўп сурган. Бундан ташқари Муқим Тошматов ҳам қайтиб келди. Ўтган йили «Андижон» учун тўп сурган футболчи биринчи даврани «Сўғдиёна» таркибида ўтказди.

Бир сўз билан айтганда, йиғинга жалб қилинган ўйинчиларнинг аксарияти мураббийларда илиқ таассурот қолдирди. Шу боис Дониёр Усмонов, Жасур Ўрунов, Муқим Тошматов, Раҳматулло Мелибоев ва Леван Мдивнишвили билан ҳам шартномалар тузилди.

«Андижон» жамоаси Тошкентга йўл олди. Якшанба куни Ўзбекистон Кубоги 1/4 финалининг жавоб учрашувида «Пахтакор»га қарши майдонга тушади.