Португалия терма жамоаси ҳужумчиси Криштиану Роналду Лондоннинг “Челси” клубига ўтмайди, деб хабар бермоқда The Telegraph.

Аввалроқ, "Челси" ёзги трансфер ойнасида Роналдуни клубга олиб келиш имкониятини кўриб чиққан бўлса, "аристократлар"нинг ўша пайтдаги бош мураббийи Томас Тухель португалияликнинг клубга ўтишига қарши эди. Немис мутахассиси ишдан бўшатилгач, лондонликлар Португалия терма жамоаси ҳужумчисига қизиқишларини сақлаб қолгани маълум бўлди.

Бироқ, манбага кўра, "Челси" бошқа трансферларга эътибор қаратиб, Роналдуни сотиб олишни режалаштирмаяпти. Жумладан, лондонликлар майдон марказини кучайтириш мақсадида англиялик футболчилар Деклан Райс (“Вест Хэм”) ва Жуд Беллингем (“Боруссия” Дортмунд) билан шартнома имзоламоқчи. Бундан ташқари, "Челси" Роналдунинг трансфери кийиниш хонасидаги ҳозирги муҳитни бузиши мумкин деб ҳисобламоқда.