Қўқондаги “марказий” стадионига ЎзПФЛ томонидан ёриткичлар талабга жавоб бермаганлиги сабабли тақиқ қўйилган эди. Жамоа ўтган йил бошида Польша давлатининг “Phlipis” компанияси ёриткичларини ўрнатиш бўйича дилер компания билан шартнома имзолаган ва бунинг учун маълум  миқдорда пул ҳам тўланган ҳамда ёриткичларнинг бир қисми Қўқонга етиб келган ҳам эди. Бироқ кейинчалик юзага келган молиявий муаммолар сабабли келишилган сумманинг қолган қисмини тўланмади ва ёриткичларнинг қолган қисмлари ҳам бизга етиб келмади.

Жамоа раҳбарияти келгуси мавсумга стадионни барча талабларга жавоб бера оладиган ҳолатга келтириш учун аллақачон амалий ишларни бошлаб юборишган.  Биринчи ўринда стадион ёриткичлари масаласи билан шуғулланган раҳбарлар аввалги компания билан шартномани бекор қилди ҳамда Литва давлатининг ЗАО “Транзито паслаугу центрас” компанияси билан янгитдан келишувга эришдилар. Бу компания ҳам “Phlipis”нинг расмий дилери ҳисобланади. Олиб борилган музокаралар натижасида Қўқонга етиб келган “Phlipis”  ёриткичларига яна қўшимча энг сўнгги русумдаги ёриткичлар ва бутловчи қисмлар келтирилади ва “Марказий” стадион ПФЛ талаб қилган ёруғлик люксига эга бўлади.

Кеча юқоридаги компания ҳисоб рақамига келишилган миқдордаги пул маблағлари тўлиғича ўтказиб берилди. Энди Литва компанияси декабрь ойи ичида, узоғи билан январь ойида ёриткичларни Қўқонга етказиб бериш масаласини ҳал қилади ҳамда янги йилнинг январь ойида “Марказий” стадионда ёриткичларни ўрнатиш ишлари олиб борилади.

Қолаверса, стадион чимини янги мавсумгача футбол ўйнаш учун идеал ҳолатга келтириш, майдон чимига мутахассислар билан маслаҳат қилган ҳолда ишлов бериш бўйича ҳам ишлар шу кунларда бошланади. Хуллас, келгуси мавсумни жамоа мухлислар қаршисида ва барча талабларга жавоб берадиган чиройли стадионда ўтказади