Бразилия терма жамоаси ҳужумчиси Неймар ўзининг жароҳати туфайли юзага келган ҳиссиётлари ҳақида гапирди. Эслатиб ўтамиз, Сербияга қарши ўйинда олган жароҳат туфайли у гуруҳ босқичининг иккинчи ва учинчи тур (Швейцария ва Камерунга қарши) баҳсларини ўтказиб юборади.

«Мамлакат терма жамоаси футболкасини кийганда мен ҳис қиладиган фахр ва ифтихор туйғусини мен таърифлаб бера олмайман. Агар Худо менга ўзим туғиладиган мамлакатни танлаш имкониятини берганида, мен Бразилияни танлаган бўлардим.

Ҳаётда ҳеч бир нарса осонлик билан берилмайди. Мен ўз мақсадларимга эришиш учун ҳаракат қилганман. Ҳеч кимга нисбатан адоват туйғусида бўлмаганман, муҳтожларга ёрдам берганман.

Бугунги фаолиятимдаги энг оғир вазиятлардан бири бўлди. Жаҳон чемпионатида яна жароҳат олдим. Ҳа, ҳафсалани пир қилади, жуда кучли оғриқ. Аммо майдонга қайтиш учун ҳали имконият бўлади. Ўз мамлакатим жамоасига ёрдам бериш учун қўлдан келган барча ишни қиламан», — де ёзди Неймар ижтимоий тармоқлар орқали.