Тошкент темир йўл муҳандислари институти стадионида бўлиб ўтган Ўзбекистон кубоги чорак финали жавоб учрашувида "Локомотив" "Бухоро" клубини қабул қилди.

4 кун илгари Бухорода бўлиб ўтган ўйинда бухороликлар 2:0 ҳисобида ғалаба қозонишган эди. Жавоб учрашувининг биринчи бўлимида ҳисоб очилмагач, иккинчи бўлимда темирйўлчилар икки марта гол киритишни уддаладилар. Аввалига, 59-дақиқада Ислом Иномов ҳисобни очган бўлса, 89-дақиқада Д.Раҳматуллаев орадаги фрақни оширди.

Бу эса ўйинда қўшимча бўлимларга ўтишини билдирарди. Учрашувнинг 110-дақиқасида мезбонлар бир киши кам бўлиб қолишди.

120-дақиқагача дарвозаларга бошқа гол киритилмади ва учрашув тақдири пенальтилар сериясида ҳал бўлди.

Дарвозаларга 9 мартадан зарба берилди ва пенальтилар сериясида 7:6 ҳисобида "Бухоро" ғалаба қозонди.

Ўзбекистон кубоги. Чорак финал. Жавоб учрашуви
ЛОКОМОТИВ (Тошкент) – БУХОРО 2:0 (0:0)
Пенальтилар серияси бўйича 6:7.
Голлар: И.Иномов (59), Д.Раҳматуллаев (89)
Дастлабки учрашув – 0:2

P.S. "Бухоро" Ўзбекистон кубогининг ярим финалида "Насаф"-"Металлург" жуфтлиги ғолибига қарши майдонга тушади.