Маҳачқалъанинг «Анжи» клуби сафида ҳаракат қилаётган Одил Аҳмедов одатдаги каби жамоасига тўлиқ – 90 дақиқа ёрдам берди. 2-турни Ростов-Донда - «Ростов»га қарши ўтказган Гуус Хиддинк шогирдлари 2 очко бой беришди. Бунга сабаб қилиб ўйиннинг 2/3 қисмида маҳачқалъаликлар бир киши кам ҳаракат қилганликларини кўрсатиш мумкин. 30-дақиқада иккинчи сариқ карточкага лойиқ кўрилган Жусилей жамоадошларини қийин аҳволга солиб қўйди.

Беллашувнинг 49-дақиқасида Расим Тагирбеков меҳмонларни олдинга олиб чиққанди. 74-дақиқада ҳакам «Анжи» дарвозаси томон пенальти белгилади ва уни майдонга тушганига 13 дақиқа бўлган Дмитрий Кириченко аниқ амалга оширди. Мезбонлар бош мураббийи ҳисоб тенглаштирувчи гол муаллифини 86-дақиқада Ян Голенда билан алмаштирди. Орадан икки дақиқа ўтиб эса Голенда мезбонларни олдинга олиб чиқди. Гарчи «Анжи» футболчилари майдонда бир киши кам ҳаракат қилаётган бўлсаларда, 95-дақиқада Тагирбековнинг дубли билан мағлубиятдан қутулиб қолишди – 2:2.

Премьер-лигага эндигина қайтган Владикавказнинг «Алания» клуби 2-турда ҳам мағлубият аламини тотиб кўрди. Қозонда Рубин меҳмони бўлган клуб 18-дақиқада пенальти қурбонига айланган бўлса, 48-дақиқада Натхо ўйин ҳолатидан ҳам 1та гол уриб, дублини расмийлаштирди. 1-турда рўйхатга ҳам киритилган Санжар Турсунов бу сафар 77-дақиқада заҳирадан майдонга туширилди. Ўзбекистонлик футболчи майдонга тушганига икки дақиқа ўтмасдан «Алания» пенальтидан ҳисобни қисқартирди. Гол муаллифи Неко. Шундан кейин меҳмонлар ҳисобни тенглаштириш учун бор кучлари билан ҳаракат қилишди. 93-дақиқада «Рубин» аъзоси Дядюн томонидан киритилган гол ўйиндаги якунийси бўлди – 3:1.

2-турдан кейин 4 очкога эга «Анжи» юз фоизлик натижа қайд этаётган «Зенит», «Локомотив» ва «Спартак» клубларидан кейин 4-ўринда бормоқда. «Алания» эса 16 клуб иштирок этадиган Премьер-лиганинг 15-пағонасига келиб жойлашган. Владикавказликлар қаторида Премьер-лиганинг янги аъзоси «Мордовия» ва ўтган мавсумни кучли тўртликда якунлаган Москванинг «Динамо» клублари ҳам бирорта очко жамғара олишмаган.