Иккинчи даврага тайёргарлик олиб бораётган Ғузорнинг “Шўртан” клуби ўз сафига “Пахтакор” жамоаси аъзоси Фарҳод Тожиевни қўшиб олганди.

Эдгар Гесс қўл остидаги машғулотларда ўзининг ижобий тарафларини кўрсатган Фарҳод Тожиев “Пахтакор” ва “Динамо” жамоаларига қарши ўтказилган ўртоқлик учрашувларида 3 маротаба (“Пахтакор” дарвозасини 1 марта, “Динамо” жамоаси дарвозасини 2 марта) нишонга олишга муваффақ бўлди.

“Шўртан” клуби раҳбарлари “Пахтакор” раҳбарияти билан Фарҳод Тожиев масаласи юзасидан музокара олиб борди ва музокаралар ижобий якунланиб, Тожиевлар оиласининг кенжаси келажакдаги бир ярим йиллик тақдирини “Шўртан” билан боғлади.

“Шўртан” билан шартнома имзолаганимдан хурсандман. Жамоага тажрибали футболчилар жамланган ва янги жамоамни тажрибали мутахассис бошқармоқда. Клуб сўнгги йилларда мамлакатимизда ўз ўрнига эга бўлди. Мен ўз олдига юқори мақсадларни қўйган жамоалар таркибида ўйнаб, ўз олдимга максимал натижалар қўйишга одатланиб қолганман. Худо ҳохласа, “Шўртан” жамоаси таркибида ҳам ўз голларим билан мухлисларни хурсанд этиш билан бир қаторда, жамоа олдига қўйилган вазифани уддалашда ўз ҳиссамни қўшаман”-дейди, Фарҳод Тожиев бир йиллик шартномага имзо чекканидан сўнг.