"Ювентус"нинг собиқ ҳужумчиси Криштиану Роналдунинг адвокатлари Турин клубининг молиявий фирибгарлиги бўйича терговга доир ҳужжатларни сўрашди, бироқ рад жавоби берилди, деб хабар бермоқда Football Italia.

"Ювентус" португалиялик ҳужумчидан 19,9 миллион евро қарздор. Роналду 2020-йилда, коронавирус пандемияси даврида тўрт ойга маошини музлатишга рози бўлганди.

Ўтган ҳафта "Ювентус" қайта кўриб чиқилган консолидацияланган молиявий ҳисоботни эълон қилди, аммо унда Роналду олдидаги қарз кўринмади.

2022 йил охирида "Ювентус" директорлар кенгаши тўлиқ истеъфога чиқди. Ушбу қарор прокуратура томонидан ҳисобот беришни бузиш фактларини текшириш ва бюджетни тасдиқлаш билан боғлиқ муаммолар билан боғлиқ. Туринликлар футболчиларнинг трансфер нархини ошириб кўрсатганликда, шунингдек, ходимларнинг маошларини камайтирганликда ва футболчиларнинг маошининг ҳақиқий ҳажмини яширганликда айбланмоқда.